زجلية ( ضاق بي الحال)

لميمة ضاق بي الحال وتشغل البال

وانا فالغربة مدفون بين فيافي وجبال

وشحال تمنيت نظرة من عينيك

تبرد الاشواق..

وشحال حنيت للمسة من ايديك

تصبرني على الفراق..

.........         ...........         ............

لوكان بيدي ماكنت نتغرب

 ولانفارق حباب

لوكان ماكنت نفرط فبلادي

 ونهجر الاصحاب

راني صابر نصرف المكتاب

لميمة من الغربة عانيت وتهديت

وشحال تمنيت نظرة من عينيك

تبرد الاشواق..

وشحال حنيت للمسة من ايديك

تصبرني على الفراق..

....         ....         ....

لميمة انا في الغربة الة

 ماتوقف ولا ترتاح

خيال ضايع محكور

بين خوتو الاشباح

نتقاسموا الجراح ليالي وصباح

حياتنا عذاب...

لميمة من الغربة راني عيت وتهديت

وشحال تمنيت نظرة من عينيك

تبرد الاشواق..

وشحال حنيت للمسة من ايديك

تصبرني على الفراق..

....         .....       ....

لميمة رجايا في رضاك

 وفحضنك الدافي

ومنايا يفرج العالي بدواه الشافي

نرجع لبلاد مرفوع الراس

سالم غانم..صافي

راني من الغربة عيت ومليت

وشحال تمنيت نظرة من عينيك

تبرد الاشواق..

وشحال حنيت للمسة من ايديك

تصبرني على الفراق